Rydyn ni’n deall y gall mabwysiadu achosi amrywiaeth eang o emosiynau, cwestiynau ac ansicrwydd. Ein rôl ni yw sicrhau eich bod yn cael eich trin â pharch, a’ch bod yn cael gwybodaeth a chymorth drwy gydol y broses.
Byddwn ni’n eich helpu i baratoi ar gyfer yr hyn y mae mabwysiadu yn ei olygu, yn ymarferol ac yn emosiynol.
Y cymorth sydd ar gael
Nid oes rhaid i chi lywio hyn ar eich pen eich hun.
Cadw mewn cysylltiad ar ôl mabwysiadu
Mewn llawer o achosion mabwysiadu, cytunir ar ryw fath o gyswllt parhaus rhwng y teulu sy’n mabwysiadu a’r teulu geni. Gall hyn gynnwys cyswllt uniongyrchol, cyswllt anuniongyrchol (blwch post), neu weithiau gyfuniad o’r ddau, yn dibynnu ar yr hyn sydd er lles pennaf y plentyn yn ôl asesiad.
Cyswllt uniongyrchol
Cyfarfodydd y cytunwyd arnyn nhw rhwng y plentyn neu’r person ifanc a’i deulu geni. Gall hyn gynnwys rhieni geni, neiniau a theidiau, brodyr a chwiorydd, aelodau o’r teulu estynedig neu ofalwyr maeth, lle bo hynny’n briodol.
Cyswllt anuniongyrchol (blwch post)
Ffordd strwythuredig o gadw mewn cysylltiad gyda chefnogaeth, fel arfer drwy gyfnewid un llythyr y flwyddyn. Dyma’r math mwyaf cyffredin o gyswllt a gall gynnwys rhieni geni, neiniau a theidiau, brodyr a chwiorydd, aelodau o’r teulu estynedig neu ofalwyr maeth.
Mae’r system cyswllt blwch post fel arfer yn dechrau ar ôl i Orchymyn Mabwysiadu gael ei roi ac yn parhau hyd nes y bydd y plentyn yn troi’n 18 oed, oni bai ei fod yn cael ei adolygu neu ei amrywio.
Cyswllt yn oedolyn
Pan fydd person a fabwysiadwyd yn cyrraedd 18 oed, mae ganddo hawl i weld ei gofnodion a phenderfynu a yw’n dymuno archwilio cyswllt.
Os ydych chi’n rhiant geni, brawd neu chwaer, nain neu daid, neu’n aelod o deulu estynedig person a fabwysiadwyd ac yr hoffech archwilio’r posibilrwydd o gysylltu unwaith y bydd yn oedolyn, gallwn ni gynnig cyngor ac arweiniad.
Rydyn ni’n darparu gwasanaethau chwilio a chyfryngu, er y gall yr amserau aros weithiau fod yn hir. Gallwn ni hefyd eich cyfeirio at sefydliadau gwirfoddol ac elusennau arbenigol sy’n cynnig gwasanaethau tebyg, er y gall y rhain godi ffi.
